வழிப்போக்கன்

கடைசி நிறுத்தமொன்றில்
தாமதமாய் வந்தடைந்தது
அதிகாலை எக்ஸ்பிரஸ் ரயில்
இறங்கையிலும் பெட்டி பைகளோடு
அவசரம் காட்டும் கூட்டத்தை
இடித்து ஏறி கழிப்பறையொன்றைத்
தேடிச் சென்றான் வழிப்போக்கன்

சேகுவேரா

குறைந்த விலையில்
பேரம்பேசி வாங்கி
பேரணிக்கு சீருடையாய்
மிடுக்காய் உடுத்திச் சென்ற
புரட்சி சேகுவேரா டீஷர்ட்
ஒருமுறை துவைத்து
கசக்கும்போதே சாயம் போனது.

பாதுகை

திமிறிய கூட்டத்தில் இடித்துக்கொண்டு
திருக்கோயில் நுழைந்தான் ராமன்
திரும்பி வந்தபின் தேடினான் தேடினான்
விட்டுச்சென்ற புத்தம்புது பாதுகைகளை
தேடிக்கொண்டே இருந்தான்
கேட்டு வாங்கிச் செல்லும்
குணம் பரதனுக்கு இல்லை.