திருட்டு

தொப்பையுடன் ஓடி துரத்திப் பிடிக்க
ரொம்பவும் கடினமாகப் பட்டது ஏட்டையாவுக்கு
மொட்டைச் சுவரை தாண்ட முடியவில்லை
பார்வையிலிருந்து மறைந்தே விட்டான் திருடன்
கால்தட்டி கண்ணடைத்து மூச்சு வாங்கியதால்
அருகேயிருந்த பொட்டிக்கடையில்
ஆற அமர ஓய்வெடுத்து ஓசியில் சோடா குடித்து
ஸ்டேஷன் திரும்புகையில்
வேகமாக வந்த வாகனங்கள் இரண்டை
நின்றபடியே பிடித்து பாக்கட் நிரப்பி வந்தார்
திருட்டுத் தொழில் பலரைப் பாதிக்கிறது என்பது
திருடனுக்குத் தெரியவேயில்லை

தேர்தல்

ஏராளம் எண்ணிக்கையில் தொகுதி வேட்பாளர்கள்
சுறுசுறுப்பாக களத்தில் திரியும் பிரமுகர்கள்
ஓட்டு பிரியுமென்ற அதிர்ச்சியில் பெரிய கட்சிகள்
எல்லாத் திசையிலும் பணம் பொருள் இலவசம்
காற்றில் கலந்து விட்டிருந்த லஞ்ச வாசம்
பரப்பரப்பான வாக்குப் பதிவின் முந்தைய இரவு
பரலோகம் சென்றார் சுயேட்சை ஒருவர் மாரடைப்பில்
வாங்கியவற்றை ஏப்பமிட்டு வரவிருக்கும் இடைத்தேர்தலை
வரவேற்கத் தயார் நிலையில் ஊர் மக்கள்

மழை

நதிகள் கரை புரண்டோடும் மழைக்காலம்
மதகுகள் வாய்திறக்க கண்மாய் நிறையும்
மரஞ்செடிகள் தரைதட்டி பாதை மறிக்கும்
நஞ்சை வயல்களில் நெற்கதிர் மூழ்கும்
குளம் குட்டையில் சாரைகள் நெளியும்
கொஞ்சமாய் வெக்காளித்து வானம் இருளும்
சாலை முகங்கள் குடைக்குள் ஒளியும்
வேக வாகனம் நீரள்ளித் தெளிக்கும்
பள்ளி மூடப்பட்டு தேர்வு தள்ளிப்போகும்
காகிதக் கப்பல்விட்டு சிறார் குதூகலிக்கும்
ஆடுமாடுகள் வாசலில் அடைந்து படுக்கும்
கூரைவழி வடிவதை பாத்திரம் சேகரிக்கும்
மின்சாரம் ஒரேயடியாய் துண்டிக்கப் படும்
கடைகள் மூடி நடமாட்டம் குறையும்
தவளைகள் இடைவெளி விட்டு கத்தும்
ஊரே சீக்கிரம் உறங்கி விடும்
காத்து மழை இடி மின்னல் தொடரும்
அரிக்கேன் அணையாமல் விழித்திருக்கும்.